Biozientziak Gipuzkoa Fundazioak, Deeptek Gipuzkoa Fundazioa izena hartuko du, eta bere jarduera-eremua mugako teknologia aurreratuetara zabalduko du, besteak beste, adimen artifizialera eta algoritmia aurreratura, teknologia kuantikoetara, material berrietara, bioteknologiara edo blockchain teknologietara.
Gipuzkoako Foru Aldundiak eta Kutxa Fundazioak bost milioi euroko inbertsio bateratua iragarri dute gaur prentsaurrekoan, deeptech teknologien eremuan enpresa-ekimenak sustatzeko. Unai Andueza ekonomia sustapena eta proiektu estrategikoetako diputatuak eta Ander Aizpurua Kutxa Fundazioko zuzendari orokorrak inbertsio estrategiko horren berri eman dute.
Inbertsio handi horrekin batera, Biozientziak Gipuzkoa Fundazioaren izena aldatuko dela iragarri dute. Aurrerantzean, Deeptek Gipuzkoa Fundazioa izena izango du.
Sortu zenetik, Biozientziak Fundazioak biozientzien sektoreko proiektuen garapena indartu eta sustatu du Gipuzkoan. Startup biosanitarioei emandako laguntzari esker, eskualdeko berrikuntza eta hazkunde ekonomikoan funtsezko aktore gisa kokatzea lortuz. Partaidetza mailegu bihurgarriak eta aditu batzorde baten babesa uztartzen dituen finantza-laguntza ereduari esker, potentzial handiko startup-ak bultzatu dira, sektore biosanitarioa sendotu eta kalitatezko enplegua sortuz.
Hasieratik, Fundazioa giltzarri izan da inbertsioa eta talentua erakartzeko, eta horri esker, Gipuzkoa bioteknologian eta berrikuntzan erreferente bihurtu da.
Orain, Deeptek Gipuzkoarekin, proiektua diziplina berrietara hedatu nahi da. Aldaketa horrek ongi islatzen du fundazioa mugako teknologietarantz eta teknologia aurreratuetarantz hedatuko dela. Teknologia horiek hainbat esparru hartzen dituzte, besteak beste, adimen artifiziala, teknologia kuantikoak, material berriak, bioteknologia, blockchaina eta beste berrikuntza aurreratu batzuk. Teknologia hauek merkaturatzeko erronkak dakartzate, baina, aldi berean, etorkizuneko sektore berriak sortzeko potentzial handia dute.
Iragarritako 5 milioi euroko inbertsioari dagokionez, Kutxa Fundazioak 2,55 milioi euroko ekarpena egingo du, eta Gipuzkoako Foru Aldundiak 2,45 milioi eurokoa. Inbertsio horren xedea garapen-fase goiztiarretan dauden startup eta ETE proiektuak finantzatzea izango da. Proiektu teknologiko berritzaileei heltzen laguntzeko, organo operatibo bat du (BIC GIPUZKOA), bai eta kanpoko adituen lankidetza ere, proiektuak ikuspuntu teknikotik, merkatukotik eta finantzariotik ebaluatzeko prozesua babesten dutenak.
Unai Andueza ekonomia sustapena eta proiektu estrategikoetako diputatuak apustu honek Gipuzkoaren garapen ekonomiko eta teknologikorako duen garrantzia nabarmendu du. Haren hitzetan, «urte asko daramatzagu biozientziaren oinarrietan lanean, eta garatzen ari diren teknologiak babesten jarraitu nahi dugu, gure jarduera-eremua zabalduz eta Gipuzkoako ekonomia eremu honetan indartuz. Aldundiaren eta Kutxa Fundazioaren arteko lankidetza horren helburua, Gipuzkoa Europa mailako erreferentziazko ekosistema gisa finkatzea da deeptechen eremuan. Ongizatea babesten duten, aberastasuna sortzen duten eta lurraldearen lehiakortasuna indartzen duten enpresa-proiektu berritzaileak sortzea bultzatuz».
Bestalde, Ander Aizpuruak, Kutxa Fundazioko zuzendari nagusiak lankidetza horren funtsezko eginkizuna nabarmendu du, eta honako hau adierazi du: «badakigu zientzia, ikerketa teknologikoa eta berrikuntza direla, XXI. mendean, enpresa-garapenaren oinarria, eta, ondorioz, edozein lurraldetan aurrera egiteko zutabeen funtsezko zati direla. Horixe da, hain zuzen ere, Gipuzkoarentzat nahi duguna, eta horixe da, hain justu, Foru Aldundiaren eta Kutxa Fundazioaren baterako proposamenaren jatorria. Deeptek Gipuzkoak ekosistema teknologikoa indartzen lagundu nahi du, bai eta gure sektore biosanitarioa garatzen ere». Ander Aizpuruak azpimarratu du, orobat, garrantzitsua dela «arlo horretako kalitate-proiektuak identifikatzea eta proiektu horiei merkatura iristen laguntzea», betiere «zorroztasunetik eta finantza-baliabideak emanez».
ONENA Medicines eta CULTZYME enpresek ere parte hartu dute prentsaurrekoan, eta, bertan, fundazioaren finantza-laguntzak enpresa hazkundean izan duen eragina nabarmendu dute. 2020az geroztik babesa jaso duen ONENA Medicinesek, adimen artifiziala erabiltzen du minbiziaren, anemiaren eta obesitatearen aurkako antigorputzen bidezko tratamenduak garatzeko. Bestalde, 2022az geroztik laguntza jasotzen duen CULTZYMEk sektore farmazeutikoa irauli du, teknologia aurreratuaren bidez prozesuak optimizatzen dituzten bioerreaktore adimendunen bidez.
Bi konpainiek argi eta garbi erakusten dute berrikuntzak eta babes finantzarioak aurrerapen teknologikoak bizkortu ditzaketela, eta aurrerapen horiek eragin handia izan dezaketela osasunean eta bioteknologian.
Sortu zenetik, fundazioak 4,5 milioi euro inbertitu ditu ekosistema bioteknologikoan, eta 17 enpresari eman die babesa funtsezko sektoreetan: gailu medikoetan (% 41,2), konposatu aurreratuen garapenean (%29,5), diagnostikoan eta prebentzioan (% 17,6) eta e-Health delakoan (% 11,7). Gipuzkoako Foru Aldundiak eta Kutxa Fundazioak, ekosistema hori sortu eta indartzeko erakunde aitzindariak diren aldetik, Gipuzkoako egungo eta etorkizuneko lehiakortasunerako eta ongizaterako funtsezkoak diren teknologien garapena bultzatzen jarraituko dute. Sektore hau funtsezkoa da etorkizuneko erronkei aurrea hartzeko, eta 129 enplegu baino gehiago sortu ditu lurraldean.
2025. urtetik aurrera, eta orain arte egindako lana erreferentziatzat hartuta, Deeptek Gipuzkoa Fundazioak bultzatu beharreko proiektu-espektroa zabaldu nahi du, funtsezko zutabe gisa kokatuz ikerketa aplikatua sustatzeko, nitxo estrategikoak identifikatzeko eta Gipuzkoan ekosistema teknologiko sendoa sortzeko.
Deeptek Gipuzkoa Fundazioaren webgunea bisitatzeko: https://deeptekgipuzkoa.eus
